KBC အကြံပေးပုဂ္ဂိုလ် ဒေါက်တာ ခလမ်ဆမ်ဆွန်ကို အကြမ်းဖက် စစ်ကောင်စီမှ တရားစွဲဆိုဖို့ရှိနေ

ဒီဇင်ဘာလ ၇ ရက်၊ ၂၀၂၂ ခုနှစ်။

မန္တလေးလေးအပြည်ပြည်ဆိုင်ရာလေဆိပ်ကနေ ထိုင်းနိုင်ငံဘက် ဆေးဝါးကုသဖို့ သွားရောက်စဉ် ဒီဇင်ဘာ ၅ ရက်နေ့က ဖမ်းဆီးခံလိုက်ရတဲ့ KBC ဥက္ကဋ္ဌဟောင်း ဒေါက်တာ ခလမ်ဆမ်ဆွန်ကို အကြမ်းဖက် စစ်ကောင်စီတပ်မှ တရားစွဲဆိုသွားဖို့ ရှိနေကြောင်း KBC တွဲဖက်အတွင်းရေးမှူး သိက္ခာတော်ရ လဖိုင်ဇော်ရာမှ KBC ဖေ့စ်ဘုတ်ပေ့ကနေ ထုတ်ပြန်ပြောဆိုလိုက်ပါတယ်။

ကချင်နှစ်ခြင်းခရစ်ယာန် အဖွဲ့ချုပ် (KBC) ရဲ့ အကြံပေးပုဂ္ဂိုလ်ဖြစ်တဲ့ သိက္ခာတော်ရ ဒေါက်တာ ခလမ်ဆမ်ဆွန်ကို အကြောင်းမဲ့ ဖမ်းဆီးထားခြင်းမှ အမြန်ဆုံးပြန်လည် လွတ်ပေးဖို့ KBC မှ ဒီဇင်ဘာ ၅ ရက်နေ့ညတွင် သဘောထား ထုတ်ပြန်လိုက်အပြီး ၆ ရက်နေ့တွင် ကချင်ပြည်နယ်ရဲ့ လုံနယ်မှ တွေ့ဆုံဖို့ အကြောင်းကြားလာကြောင်း သိရပါတယ်။

KBC အဖွဲ့ချုပ်မှ အဖွဲ့ဝင် ၄ ဦးနဲ့ လုံနယ်တို့ တွေ့ဆုံဆွေးနွေးစဉ် ဆရာတော်အနေဖြင့် ပြစ်မှုမြောက်တဲ့အရာများကို ကျူးလွန်ထားကြောင်း သင်တန်းပို့ချထားတဲ့ ဖိုင်များကို ဖော်ပြလာကာ တရားစွဲဆိုသွားဖို့ ရှိနေတယ်လို့ ပြောဆိုလာကြောင်း သိရပါတယ်။

ယခုလို လုံနယ်ဘက်မှ တရားစွဲဆိုဖို့ ပြောဆိုလာခြင်းကြောင့် KBC အနေဖြင့် ကော်မတီဖွဲ့ကာ ဆရာတော်လွတ်မြောက်နိုင်ရေးအတွက် ဆွေးနွေးတိုင်ပင်သွားမှာဖြစ်ကြောင်း ရုပ်သံတွင် ပြောဆိုထားပါတယ်။

KBC ဥက္ကဋ္ဌဟောင်းလည်းဖြစ် ယခုတွင် အကြံပေးပုဂ္ဂိုလ်လည်းဖြစ်တဲ့ ဒေါက်တာ ခလမ်ဆမ်ဆွန်ကို အကြမ်းဖက် စစ်ကောင်စီမှ မည်သည့်နေရာတွင် ဖမ်းဆီးထားခြင်းကို မသိရှိရေးသေးကာ မိသားစုဝင်များနဲ့ တွေ့ဆုံနိုင်ခြင်းမရှိသေးကြောင်း သိရပါတယ်။

အကြမ်းဖက်စစ်ကောင်စီတပ်ရဲ့ ယခုလို ဖမ်းဆီးခံထားတဲ့ သိက္ခာတော်ရ ဒေါက်တာခလမ်ဆမ်ဆွန်ကို အမြန်ဆုံးချွင်းချက်မရှိ ပြန်လွတ်ပေးဖို့ American Baptist Churches USA, World Kachin Congress, ကချင်ရိုးရာယာဉ်ကျေးမှုနှင့် စာပေအဖွဲ့ချုပ်နဲ့ အခြားသောအဖွဲ့အစည်းများကလည်း ထုတ်ပြန်ကြေညာထားကြပါတယ်။

သိက္ခာတော်ရ ဒေါက်တာ ခလမ်ဆမ်ဆွမ်က ကချင်နှစ်ခြင်းခရစ်ယာန်အဖွဲ့ချုပ် KBC တွင် အတွင်းရေးမှုးအဖြစ် ၈ နှစ်၊ ဥက္ကဋ္ဌအဖြစ် ၄ နှစ် တာဝန်ထမ်းဆောင်ခဲ့ပြီး လက်ရှိတွင် KBC အကြံပေးပုဂ္ဂိုလ်အဖြစ်နဲ့ ကချင်အမျိုးသားအတိုင်ပင်ခံအဖွဲ့ WMR ရဲ့ ဥက္ကဌ အဖြစ် တာဝန်ထမ်းဆောင်နေသူဖြစ်ကာ ကချင်လူထုကြား လူသိများ အရှိန်အဝါရှိသူတစ်ဦးလည်းဖြစ်ပါတယ်။

ဖားကန့် မဒဲန်ယန်တွင် ၂ ရက်ဆက် KIA, KPDF ပူးပေါင်းတပ်နဲ့ အကြမ်းဖက် စစ်ကောင်စီတိုက်ပွဲဖြစ်ပွားခဲ့

ဒီဇင်ဘာ ၇ ရက်၊ ၂၀၂၂ ခုနှစ်။

ဖားကန့်မြို့နယ် မဒဲန်ယန် (မှော်ဘုံ) ကျေးရွာတွင် ယမန်နေ့ ဒီဇင်ဘာ ၆ ရက် ညနေပိုင်း ၄ နာရီခန့်က အကြမ်းဖက် စစ်ကောင်စီတပ်နဲ့ KIA, KPDF ပူးပေါင်းတပ်ကြား တိုက်ပွဲဖြစ်ပွားမှု ရှိခဲ့ပါတယ်။

ကေအိုင်အေတပ်မဟာ ၉ တပ်ရင်း ၆ နယ်မြေထဲရှိတဲ့ မဒဲန်ယန်ကျေးရွာ ဘုန်းကြီးကျောင်းထဲ တပ်စွဲနေရာယူနေတဲ့ အင်အား ၄၀ ဝန်းကျင်ပါ အကြမ်းဖက် စစ်ကောင်စီတပ်ကို KIA, KPDF ပူးပေါင်းတပ်မှ ဝင်ရောက်တိုက်ခိုက်ခဲ့ကာ ညနေ ၈ နာရီခန့်မှာတော့ နှစ်ဖက် အပြန်အလှန် လက်နက်ကြီးများဖြင့် တိုက်ခိုက်မှုတွေ ထပ်မံရှိခဲ့ကြောင်း သိရပါတယ်။

တိုက်ပွဲဖြစ်ပွားနေချိန် ဖားကန့်မြို့ပေါ်ရှိ ဗျူဟာကုန်းကနေ အကြမ်းဖက် စစ်ကောင်စီတပ်မှ ၁၂၀-မမ လက်နက်ကြီးဖြင့် တိုက်ပွဲဖြစ်ပွားရာနေရာ ပစ်ခတ်မှုများ လုပ်ဆောင်နေခဲ့ပြီး မဇွပ်ယန်အချုပ်ထောင်တွင် တပ်စွဲနေရာယူထားတဲ့ ခလရ ၇၆ တပ်လည်း ၆၀-မမ လက်နက်ကြီးဖြင့် ၄ ကြိမ် ပစ်ခတ်ခဲ့တာကြောင့် အချို့ကျေးရွာတွင် ကျရောက်ပေါက်ကွဲတာတွေ ရှိခဲ့ကြောင်း သိရပါတယ်။

ယနေ့ ဒီဇင်ဘာ ၇ ရက်နေ့ မနက်ပိုင်းတွင် မဒဲန်ယန်ဘုန်းကြီးကျောင်းရှိ စစ်ကောင်စီတပ်ကို KIA, KPDF ပူးပေါင်းတပ်မှ ထပ်မံဝင်ရောက်ပစ်ခတ်ခဲ့စဉ် အကြမ်းဖက် စစ်ကောင်စီတပ်ရဲ့ လက်နက်ခဲယမ်းများကို သိမ်းဆည်းနိုင်ခဲ့ကြောင်း သိရပါတယ်။

အဆိုပါ မဒဲန်ယန်ဘုန်းကြီးကျောင်းတွင် အရပ်သားများကို ဖမ်းဆီးထိန်းသိမ်းထားမှုတွေလည်း ရှိခဲ့ကာ အများစုကို စစ်ကြောရေးပို့ဆောင်သွားခဲ့ကြောင်း သိရပြီး ဖားကန့်လမ်းပိုင်းရှိ ခွမ်ဆိုင်၊ ဂေါ်လူယန်၊ ခရိုင်ရွန်၊ ဂတ်နွယ်နဲ့ နန့်ယားကျေးရွာရှိ ဒေသခံများကို ပေါ်တာဆွဲ ဖမ်းဆီးထားရာကနေ ယနေ့အချိန်ထိ လွတ်မြောက်ခြင်းမရှိသေးတာကြောင့် မိသားစုဝင်များကလည်း စိုးရိမ်နေကြရပါတယ်။

ဆိုင်းတောင်ရဲစခန်းကို KIA မှ ဒရုန်းဖြင့်တိုက်ခိုက် ၁ ဦးသေ ၅ ဦးဒဏ်ရာရ

ဒီဇင်ဘာလ ၆ ရက်၊ ၂၀၂၂ ခုနှစ်။

ဖားကန့်မြို့၊ ဆိုင်းတောင်ကျေးရွာရှိ  အကြမ်းဖက် စစ်ကောင်စီတပ်ရဲ့ ရဲစခန်းကို ယနေ့ ဒီဇင်ဘာ ၆ ရက်နေ့ မနက် ၉ နာရီခန့်တွင် ကေအိုင်အေတပ်မှ ဒရုန်းဖြင့် မိုင်းခွဲတိုက်ခိုက်ခဲ့ကြောင်း သိရပါတယ်။

ကေအိုင်အေတပ်မှ ဒရုန်းဖြင့်တိုက်ခိုက်စဉ် ရဲစခန်းဝင်းတွင်း ကျရောက်ပေါက်ကွဲခဲ့တာကြောင့် ရဲတစ်ဦးသေဆုံးပြီး ၅ ဦး ဒဏ်ရာရရှိခဲ့ကြောင်း ခိုင်လုံတဲ့သတင်းတွေ အရသိရပါတယ်။

ဖားကန့်ဒေသတွင် အကြမ်ဖက် စစ်ကောင်စီတပ်သားများနဲ့ လက်ကိုင်တုတ်ဖြစ်တဲ့ ရဲတပ်များ ပူးပေါင်းပြီး မြို့တွင်း စစ်ရေးလှုပ်ရှားမှု ဆက်တိုက်လုပ်ဆောင်နေတာကြောင့် ကေအိုင်အေတပ်မှ ကြားဖြတ်မိုင်းဆွဲတိုက်ခိုက်မှုတွေကလည်း ဆက်တိုက်ရှိနေကြောင်း သိရပါတယ်။

ယမန်နေ့ကစတင်ပြီး လုံးခင်းကျေးရွာအုပ်စု၊ မှော်ပုံ (မဒဲယန်) အနီးတဝိုက်တွင် တိုက်ပွဲဖြစ်ပွားမှုများရှိနေပြီး လက်နက်ကြီးလက်နက်ငယ်သံများကြောင့် ဒေသခံပြည်သူများ စိုးရိမ်ထိတ်လန့်နေကြရပြီး မဒဲယန်ဒေသခံများက နေအိမ်အပြင်ထွက်ဖို့တောင် မဖြစ်နိုင်တဲ့အခြေအနေ ဖြစ်ပေါ်နေကြောင်း သိရပါတယ်။

အကြမ်းဖက် စစ်ကောင်စီတပ်ရဲ့ ဖားကန့်ဗျူဟာကုန်းနဲ့ မဇွပ်ယန် အချုပ်ထောင် ကနေ လက်နက်ကြီး ပစ်ခတ်နေမှုများ ဆက်တိုက်လုပ်နေကာ ဒေသခံနေအိမ်အနီး လက်နက်ကြီးအပိုင်းအစ ကျရောက်မှုတွေအထိ ဖြစ်ပေါ်နေကာ ယနေ့ညနေပိုင်းတွင်လည်း လက်နက်ကြီး ပေါက်ကွဲသံများကြောင့် အနီးဝန်းကျင်ရှိ ကျောက်စိမ်းလုပ်ကွက်ရှိ လုပ်သားများ ထွက်ပြေးတိမ်းရှောင်နေကြရကြောင်း မြေပြင်သတင်းများအရ သိရပါတယ်။

ဓါတ်ပုံ-ယနေ့ည ၈ နာရီချိန် လက်နက်ကြီးပေါက်ကွဲသံကြောင့် မှော်စီစာ ကျောက်စိမ်းလုပ်ကွက်များအတွင်းမှထွက်ပြေးနေကြသော မြင်ကွင်း

Photo Credit ot Owner

မိသားစုဝင် ၇ ဦး မီးလောင်မှုတွင် အသက်ဆုံးရှုံးခဲ့ရ

ဒီဇင်ဘာလ ၂ ရက်၊ ၂၀၂၂ ခုနှစ်။

ဝိုင်းမော်မြို့နယ် အင်ဂန်းကျေးရွာတွင် ယမန်နေ့ ဒီဇင်ဘာ ၁ ရက်နေ့ ညနေ ၁၀ နာရီခန့်တွင် နေအိမ်တစ်လုံး မီးလောင်ပြီး မိသားစုဝင် ၇ ဦး အထိ သေဆုံးသွားခဲ့တဲ့ ဝမ်းနည်းဖွယ်ဖြစ်ရပ်တစ်ခု ဖြစ်ပွားခဲ့ပါတယ်။

မီးလောင်ကျွမ်းရခြင်းက နေအိမ်အောက်ထပ်တွင် ဝါယာရှော့ခ်ဖြစ်ပွားခဲ့တာကြောင့် မီးစတင်လောင်ကျွမ်းခဲ့ပြီး သိုလှောင်ထားတဲ့ လောင်စာဆီများထံ ကူးစက်သွားခြင်းက မီးလောင်မှုကို အားပြင်းစေခဲ့တာဖြစ်ကြောင်း သိရပါတယ်။

မိသားစုဝင်များဖြစ်တဲ့ အသက် ၇၀ နှစ်အရွယ် အင်ဂန်းခါး နဲ့ အသက် ၂ နှစ်ကနေ ၁၁ နှစ် ကြားရှိတဲ့ ကလေး ၆ ဦးတို မီးလောင်မှုတွေ သေဆုံးသွားခဲ့ရကာ အဖိုးတန်ပစ္စည်းများနဲ့ နေအိမ်အားလုံးနီးပါ ဆုံးရှုံးခဲ့ရပါတယ်။

ဖခင်ဖြစ်သူ စိုက်ပျိုးခြံထဲ သွားရောက်နေစဉ် မီးလောင်မှု ဖြစ်ပွားခဲ့ခြင်းဖြစ်ကာ အင်ဂန်းကျေးရွာတွင် နေအိမ်တစ်ခုနဲ့ တစ်ခုအလှမ်းဝေးခြင်းကြောင့် နဘေးအိမ်များ ထိခိုက်ခဲ့ခြင်းတော့ မရှိခဲ့ကြောင်း သိရပါတယ်။

အင်ဂန်းကျေးရွာတွင် အိမ်ထောင်စု ၁၀၀၀ ကျော်ရှိကာ လူဦးရေ ၇၀၀၀ ကျော် နေထိုင်ပြီး ဒေသခံအများစုကတော့ တောင်ယာခုတ်ခြင်း စိုက်ပျိုးခြံလုပ်ငန်းများဖြင့် အသက်မွေးဝမ်းကြောင်း လုပ်ကိုင်ကြသူများဖြစ်ပါတယ်။

အကြမ်းဖက် စစ်ကောင်စီတပ်မှ ပြည်သူ ၅၀ နီးပါးကို လူသားဒိုင်းအဖြစ် ပေါ်တာဆွဲ

ဒီဇင်ဘာလ ၂ ရက်၊ ၂၀၂၂ ခုနှစ်။

ဖားကန့်မြို့နယ် ခွမ်ဆိုင်ဇွပ်ကျေးရွာထိပ် ဆုတောင်းတောင်ပေါ်တွင် တပ်စွဲနေရာယူနေတဲ့ အကြမ်းဖက် စစ်ကောင်စီတပ် တပ်မ ၃ လက်အောက်ရှိ ခလရ ၄၂ မှ အင်အား ၁၀၀ ကျော်ပါတပ်ဖွဲ့က နိုဝင်ဘာ ၃၀ ရက်နေ့  ညနေပိုင်းတွင် အဆိုပါကျေးရွာတဝိုက်ရှိ ပြည်သူများကို ပေါ်တာဆွဲခေါ်သွားကြောင်း သိရပါတယ်။

အကြမ်းဖက် စစ်ကောင်စီတပ်မှ ညနေပိုင်း ဖြတ်သန်းသွားလာတဲ့ အမျိုးသားတိုင်းကို ဖမ်းဆီးခဲ့ခြင်းဖြစ်ကာ ဖားကန့်မြို့ကနေ ဆင်းလာတဲ့ ကားသမားနဲ့ ခရီးသွားပြည်သူ အယောက် ၆၀ ဝန်းကျင်ကိုလည်း ဖမ်းဆီးခဲ့ပြီး ဒီဇင်ဘာ ၁ ရက်နေ့ မနက် ၅ နာရီခန့် နန့်ယားစစ်တပ်ဘက် ခေါ်ဆောင်သွားခဲ့ကာ ပြန်လည်လွတ်ပေးခဲ့ပေမယ့် ဒေသခံများကိုတော့ လွတ်ပေးခဲ့ခြင်းမရှိတာကြောင့် မိသားစုဝင်များက စိုးရိမ်နေကြရပါတယ်။

အဆိုပါ စစ်ကြောင်းက ဖားကန်မြို့ လုံးခင်းကျေးရွာကနေ နိုဝင်ဘာ ၂၇ ရက်နေ့က ထွက်ခွာလာတဲ့ အဖွဲ့ဖြစ်ပြီး ခွမ်ဆိုင်ဇွပ်ကျေးရွာထိပ်တွင် ရပ်နားက နန့်ယားတပ်စခန်းဘက် ပြန်လည်ထွက်ခွာလာခြင်းဖြစ်ကြောင်း သိရပါတယ်။

ယနေ့ ဒီဇင်ဘာ ၂ရက်နေ့ မနက် ၉ နာရီခန့်တွင် ဖားကန့်မြို့နယ် လုံးခင်းကျေးရွာတွင် လက်နက်ကိုင်ဆောင်ထားတဲ့ လူ ၂ ဦး ဖုန်းဆိုင်တစ်ခုကို ဓားပြတိုက်ကာ နေအိမ်ပေါ်အထိ တက်ပြီး ပိုက်ဆံများနဲ့ ဖုန်းများ ယူဆောင်ကာ ပြင်ပတွင် ရပ်နားထားတဲ့ ဆိုင်ကယ်တစ်စီးလည်း ယူဆောင်သွားခဲ့ကြောင်း ဒေသခံများထံမှ သိရပါတယ်။