မတ်လ ၂၅ ရက်၊ ၂၀၂၃ ခုနှစ်။

ရွှေကူမြို့နယ်၊ မံဝိန်းကျေးရွာအနီး ယနေ့ မတ်လ ၂၅ ရက်နေ့ ညနေပိုင်း ၁ နာရီခွဲခန့်တွင် ကေအိုင်အေတပ်မဟာ ၃ တပ်ရင်း ၁၂ နဲ့ အကြမ်းဖက် စစ်ကောင်စီတပ်ကြား တိုက်ပွဲဖြစ်ပွားခဲ့ပါတယ်။

အကြမ်းဖက် စစ်ကောင်စီတပ်က ကေအိုင်အေနယ်မြေဘက် စစ်ရေးလှုပ်ရှားမှု ပြုလုပ်လာစဉ် KIA, KPDF ပူးပေါင်းတပ်နဲ့ ထိတွေ့တိုက်ပွဲဖြစ်ပွားခဲ့ကာ ညနေပိုင်း ၃ နာရီခွဲခန့်မှာတော့ မြစ်ကြီးနားလေတပ်စခန်းမှ ဂျက်တိုက်လေယာဉ် ၂ စီးဖြင့်  မံဝိန်းကြီး ဘုန်းကြီးကျောင်းအနီး ဆီတနဲ့ ဆီမူလေးတဝိုက် နဲ့ ဝင်ဝဘက် လေကြောင်းဗုံးကြဲတိုက်ခိုက်မှု ပြုလုပ်နေခဲ့ကြောင်း သိရပါတယ်။

အဆိုပါ အကြမ်းဖက် စစ်ကောင်စီတပ် ခလရ ၁၀ နဲ့ ခမရ ၆၀၂ တပ်က အင်အား ၁၀၀ ကျော်ဖြင့် ရွှေကူနယ်ဘက် လွန်ခဲ့သော ၃ ရက်ကတည်းက ထိုးစစ်ဆင် စစ်ရေးလှုပ်ရှားမှု ပြုလုပ်လာခြင်းကြောင့် KIA, KPDF ပူးပေါင်းတပ်မှ ကြားဖြတ်တိုက်ခိက်မှု ပြုလုပ်ခဲ့တာဖြစ်ပါတယ်။

မတ်လ ၂၄ ရက်နေ့ကလည်း ငှက်တံတားတဝိုက် နှစ်ဖက်တိုက်ပွဲဖြစ်ပွားမှု ရှိခဲ့ကာ အကြမ်းဖက် စစ်ကောင်စီတပ်မှ သေဆုံးထိခိုက်မှု ရှိတာကြောင့် ဒေသခံ နေအိမ် ၂ လုံး မီးရှို့ဖျက်ဆီးလိုက်ကြောင်း သိရပါတယ်။

မတ်လ ၁၉ ရက်၊ ၂၀၂၃ ခုနှစ်။

ကချင်စစ်ဘေးရှောင်စခန်းတစ်ခုဖြစ်တဲ့ ဂျယ်ယာန် စခန်းတွင် ယနေ့ မတ်လ ၁၉ ရက်နေ့ မီးလောင်ကျွမ်းမှုဖြစ်ပွားပြီး နေအိမ် ၃၇ လုံး မီးလောင်ပျက်စီးသွားခဲ့ရကာ စစ်ဘေးရှောင် ပြည်သူ ၁၇၈ ဦး မီးဘေးသင့်မှုကို ခံစားခဲ့ရပါတယ်။

အဆိုပါ စစ်ဘေးရှောင်စခန်းက ကေအိုင်အိုဌာနချုပ်ရှိရာ လိုင်ဇာမြို့အနီးတွင် တည်ရှိတာဖြစ်ပြီး လျှပ်စစ်မီး ဝါယာရှော့ကြောင့် မီးစတင်လောင်ကျွမ်းသွားခြင်းဖြစ်ကာ မီးသတ်ကား ၂ စီးနဲ့အတူ ပြည်သူများ အတူတကွဝိုင်းဝန်း ငြိမ်းသတ်ခဲ့ရကြောင်း သိရပါတယ်။

လက်ရှိအချိန်မှာတော့ နေအိမ်များမီးလောင်ထဲတွင် ပါဝင်သွားတဲ့ စစ်ဘေးရှောင်မိသားစုများကို စခန်းတာဝန်ရှိသူများက ဂျယ်ယာန် အထက်တန်းကျောင်းတွင် နေရာချထားပေးကာ အမျိုးသမီးကော်မတီအနေဖြင့် ရပ်ကွက်အတွင်းရှိ မိခင်များနဲ့ စုပေါင်းကာ အစားအသောက် ချက်ပြုတ်ပံ့ပိုးပေးနေကြောင်း စခန်းတာဝန်ခံ ဇင့်ဝါလဆိုင်း ကပြောပါတယ်။

ယခုလို စစ်ဘေးရှောင်နေအိမ်များ မီးလောင်ကျွမ်းသွားခဲ့ရတာကြောင့် အစားအသောက်၊ အဝတ်အစားများနဲ့ အိမ်သုံးပစ္စည်းအားလုံး မီးလောင်ထဲတွင် ပါဝင်သွားခြင်းကြောင့် အဝတ်တစ်ထည် ကိုယ်တစ်ခုဖြင့် နေထိုင်နေရတာကြောင့် အကူအညီများ လိုအပ်လျက်ရှိနေပါတယ်။

မတ်လ ၁၈ ရက်၊ ၂၀၂၃ ခုနှစ်။

ပူတာအိုမြို့နယ်၊ တန်ဂျာအနီး အင်ခေါချောင်းတွင် မတ်လ ၁၈ ရက် ယနေ့မနက် ၇ နာရီခန့်တွင် ကေအိုင်အေတပ်မဟာ (၁) တပ်ရင်း ၇ နဲ့ အကြမ်းဖက် စစ်ကောင်စီတပ်ကြား ထိတွေ့တိုက်ပွဲဖြစ်ပွားမှု ရှိခဲ့ပါတယ်။

ပူတာအိုလမ်းဆုံနဲ့ တန်ဂျာအနီး စစ်ရေးလှုပ်ရှား ထိုးစစ်ဆင်လာတဲ့ အကြမ်းဖက် စစ်ကောင်စီတပ်က ကေအိုင်အေတပ်စခန်းအနီးဘက် ရောက်ရှိလာခြင်းကြောင့် နှစ်ဖက်ထိပ်တိုက် တိုက်ပွဲဖြစ်ပွားခဲ့ကာ တိုက်ပွဲအခြေအနေကိုတော့ အသေးစိတ်မသိရှိရသေးပါဘူး။

ကေအိုင်အေ တပ်မဟာ ၁ ပူတာအိုခရိုက်ဘက် မတ်လ ကစတင်ပြီး အကြမ်းဖက် စစ်ကောင်စီတပ်ရဲ့ မြောက်ပိုင်းတိုင်းစစ်ဌာနချုပ်မှ စစ်အင်အားအလုံးအရင်းဖြင့် စစ်ကြောင်းထိုးလာခြင်းကြောင့် မတ်လ ၉ ရက်နေ့ကစတင်ပြီး တိုက်ပွဲဆက်တိုက်ဖြစ်ပွားနေတာဖြစ်ပါတယ်။

မတ်လ ၁၄ ရက်နေ့တုန်းက အကြမ်းဖက် စစ်ကောင်စီတပ်မှ စစ်ကြောင်း ၃ ခုဖြင့် ထိုးစစ်ဆင်လာခြင်းကြောင့် ကေအိုင်အေတပ်ရင်း ၁၀ နဲ့ မိုင်ထောင်းကျေးရွာ လောင်ခါးတောင်အနီးတစ်ကြိမ်နဲ့ ကဝါးပန်နဲ့ ဆွပ်ချောင်းအနီးတွင်လည်း တစ်ကြိမ်နဲ့ အနည်းဆုံး ၃ ကြိမ် ပြင်းထန်စွာ တိုက်ပွဲဖြစ်ပွားခဲ့ကြောင်း သိရပါတယ်။

လက်ရှိအချိန်တွင် အကြမ်းဖက် စစ်ကောင်စီတပ်က စစ်အင်အား ၂၀၀ ကျော်ဖြင့် တိုက်ပွဲဖြစ်ပွားရာနေရာတဝိုက် စစ်ရေးလှုပ်ရှားမှု ပြုလုပ်နေသေးတာကြောင့် တိုက်ပွဲများ ဆက်လက်ဖြစ်ပေါ်နေအုံးမှာ ဖြစ်ကြောင်း သုံးသပ်နေကြပါတယ်။

မတ်လ ၁၂ ရက်၊ ၂၀၂၃ ခုနှစ်။

ဆွမ်ပရာဘွမ်မြို့နယ်ဘက် စစ်ကြောင်းထိုးဝင်ရောက်လာတဲ့ အကြမ်းဖက် စစ်ကောင်စီတပ်နဲ့ ကချင်လွတ်လပ်ရေးတပ်မတော် တပ်မဟာ ၁ တပ်ရင်း ၂၂ ကြား မတ်လ ၁၁ ရက်နေ့ ညနေပိုင်း ၈ နာရီခန့်တွင် တိုက်ပွဲဖြစ်ပွားခဲ့ပါတယ်။

ဆွမ်ပရာဘွမ်မြို့နယ်၊ ဆွမ်ခါးကျေးရွာအနီးဘက် တစ်နေ့လုံးနီးပါး ထိုးစစ်ဆင် စစ်ကြောင်းလှုပ်ရှားလာတဲ့ အကြမ်းဖက် စစ်ကောင်စီတပ်က ညအချိန်အရောက်မှာတော့ KIA, KPDF ပူးပေါင်းတပ်မှ စောင့်ကြိုတိုက်ခိုက်ပြီး နှစ်ဖက်တိုက်ပွဲဖြစ်ပွားခဲ့ခြင်းဖြစ်ကြောင်း သိရပါတယ်။

ထို့အပြင် ကေအိုင်အေတပ်မဟာ ၁ တပ်ရင်း ၄ နယ်မြေ မယောင်ဇွပ်အနီးတွင် မတ်လ ၉ ရက်နေ့က မြစ်ကြီးနားကနေ ကား ၄ စီးဖြင့် စစ်အင်အား ၇၀ ပါ စစ်ကြောင်းက ကေအိုင်အေနယ်မြေဘက် ဝင်ရောက်လာခြင်းကြောင့် မိုင်းဆွဲတိုက်ခိုက်ပြီး တိုက်ပွဲပြင်းထန်စွားဖြစ်ပွားခဲ့ပါသေးတယ်။

မြစ်ကြီးနား-ဆွမ်ပရာဘွမ်လမ်းပိုင်းဘက် အကြမ်းဖက် စစ်ကောင်စီတပ်မှ စစ်အင်အား၊ လက်နက်ခဲယမ်းနဲ့ ရိက္ခာဖြည့်တင်းမှုတွေ ယခုလပိုင်းအတွင်း လုပ်ဆောင်မှုတွေ ထပ်လုပ်လာခြင်းကြောင့် တိုက်ပွဲတွေ ဖြစ်ပွားမှု ရှိလာပြီး KPDF အနေဖြင့် မြစ်ကြီးနား-ပူတာအိုလမ်းပိုင်း သွားလာမည့် ကုန်ကားနဲ့ ခရီးသည်ယာဉ်များအနေဖြင့် ညနေ ၆ နာရီမှ နံနက် ၆ နာရီအတွင်း သွားလာခြင်းခွင့်မပြုထားသလို သတ်မှတ်ချက်များဖြင့် ခရီးသွားလာကြဖို့ ထုတ်ပြန်ထားပါတယ်။

မတ်လ ၁၁ ရက်၊ ၂၀၂၃ ခုနှစ်။

ယခုရက်ပိုင်းအတွင်း ဖားကန့်မြို့တွင် အကြမ်းဖက် စစ်ကောင်စီတပ်မှ ပြည်သူများကို အကြောင်းမဲ့ဖမ်းဆီးမှုတွေ ဆက်တိုက်ဖြစ်ပေါ်နေပြီး မတ်လ ၁၁ ရက်နေ့တွင်လည်း ဖားပြင်ကျေးရွာတွင် ဒေသခံ ၄ ဦးကို ဖမ်းဆီးသွားခဲ့ကြောင်း သိရပါတယ်။

ဖမ်းဆီးခံလိုက်ရတဲ့ ပြည်သူများက ဖားပြင် ကချင်ရိုးရာယဉ်ကျေးမှုရုံးတွင် အစည်းအဝေးလုပ်ဆောင်နေစဉ် အကြမ်းဖက် စစ်ကောင်စီတပ်မှ အိမ်စီးကား ၄ စီးဖြင့် ရောက်လာကာ သေနတ်ပစ်ခြိမ်းခြောက်ပြီး စည်းဝေးနေသူများကို ဖမ်းဆီးရာ ၂ ဦးလွတ်မြောက်ပြီး ဒေသခံ ၄ ဦးကတော့ ဖမ်းဆီးခံလိုက်ရတာဖြစ်ပါတယ်။

အကြမ်းဖက် စစ်ကောင်စီရဲ့ ဖမ်းဆီးခြင်းကို ခံလိုက်ရသူထဲမှ ၂ ဦးကတော့ သေနတ်ကျည်ထိမှန် ထိခိုက်ဒဏ်ရာရရှိထားတဲ့ အနေအထားဖြင့် ဖမ်းခံလိုက်ရတာကြောင့် မိသားစုဝင်များက စိုးရိမ်နေကြရကြောင်း သိရပါတယ်။

ဖားကန့်ဒေသတွင် ဒေသခံပြည်သူများ ယခုလအစောပိုင်းကစတင်ပြီး နေ့တိုင်းလိုလို အကြောင်းမဲ့ ဖမ်းဆီးခံရမှုတွေ ရှိလာတာကြောင့် ဒေသခံများက သွားလာရေး စိုးရိမ်နေကြရပြီး ယနေ့ မနက်ပိုင်းတွင်လည်း ဆိုင်ကယ်စီးနင်းလာတဲ့ ပြည်သူ ၂ ဦးကို အကြမ်းဖက် စစ်ကောင်စီတပ်ဖွဲ့မှ ပစ်သတ်သွားခဲ့ကြောင်း သိရပါတယ်။