တက္ကသိုလ်ဝင်ခွင့်အောင်စာရင်း ကြည့်ရှုရာတွင် တိုးဝှေ့ပြီးကြည့်ရှုခြင်း ဓလေ့ရှိတာကြောင့် ယခုနှစ်အောင်စာရင်းထုတ်ပြန်ခြင်းကိုတော့ ပုံစံပြောင်းပြီး ပညာရေးဝန်ကြီးဌာနက စီစဉ်ထားပါတယ်။
ကိုဗစ်-၁၉ ရောဂါ ကာကွယ်နှိမ်နှင်းရေးအချိန်ဖြစ်တာကြောင့် တက္ကသိုလ်ဝင်ခွင့်အောင်စာရင်းများကို ယခင်နှစ်ကအတိုင်း ကျောင်းတွင်သင်ပုန်းကပ်ထုတ်ပြန်ပေးခြင်းကို ယခုနစ်တွင် တစ်ခါတည်းလုပ်ဆောင်တော့မှာ မဟုတ်ပဲ သတ်မှတ်ထားတဲ့ အွန်လိုင်းစာမျက်နှာကနေ ဩဂုတ်လ ၉ ရက် တနင်္ဂနွေမနက်မှာ ထုတ်ပြန်သွားမှာဖြစ်ပြီး သင်ပုန်းကပ်ခြင်းကိုတော့ သက်ဆိုင်ရာကျောင်းများတွင် ဩဂုတ်လ ၁၀ ရက်နေ့ကျမှသာ အမည်စာရင်း ထုတ်ပြန်ပေးသွားဖို့ ရှိနေပါတယ်။
အွန်လိုင်းအမည်စာရင်းထုတ်ပြန်ခြင်းကိုတော့ www.moegov.mm နဲ့ www.myanmarexam.org စတဲ့ Website တွင် ဒေသအလိုက် ထုတ်ပြန်ပေးသွားမှာဖြစ်ကာ သင်ပုန်းကပ်ထုတ်ပြန်မည့်ရက်တွင်လည်း ကိုဗစ်-၁၉ ကော်မတီက ထုတ်ပြန်ထားချက်များအတိုင်း တစ်ဦးနဲ့တစ်ဦး ခပ်ခွာခွာစနစ်ဖြင့် ကြည့်ရှုကြဖို့ ထုတ်ပြန်ထားပါတယ်။
မြန်မာနိုင်ငံတွင် ကိုဗစ်-၁၉ ရောဂါ ပိုးတွေ့လူနာ ၃၅၉ ဦးအထိရှိကာ ပြန်လည်သက်သာသူကတော့ ၃၀၉ ဦးဖြစ်ပြီး ဓာတ်ခွဲစစ်ဆေးမှု ၁၂၃၄၄၁ ဦးကို ပြုလုပ်ခဲ့တဲ့ ရလဒ်ဖြစ်ပြီး ပိုးတွေ့ သေဆုံးလူနာက ၆ ဦးဖြစ်ပါတယ်။
လက်ရှိအချိန် ပိုးတွေ့လူနာများဟာ ပြည်ပနိုင်ငံများမှ ပြန်လည်ဝင်ရောက်လာတဲ့ နိုင်ငံသားများဖြစ်ပြီး ပြည်တွင်း ကူးစက်မှုကတော့ ရပ်တန့်နေခြင်းဖြစ်ပေမယ့် ကမ္ဘာ့နိုင်ငံများနဲ့ အိမ်နီးချင်းနိုင်ငံများတွင် ကိုဗစ်-၁၉ ရောဂါဖြစ်ပွားမှု ဆိုးရွားစွာဖြစ်ပွားနေတာကြောင့် နိုင်ငံတွင်းတွင်လည်း ကိုဗစ်-၁၉ ကာကွယ်ရေးနည်းလမ်းများကိုတော့ ဆက်လက်လုပ်ဆောင်သွားရအုံးမှာဖြစ်ပြီး ကိုဗစ်-၁၉ ရောဂါကာကွယ်ထိန်းချုပ်တားဆီးရေးအချိန်ကိုလည်း ဩဂုတ်လ ၁၅ ရက်နေ့အထိ တိုးမြင့်ထားကာ လူဦးရေ ၁၅ ဦးထက်ပိုပြီးစုဝေးခြင်းမပြုလုပ်ဖို့ ထုတ်ပြန်ထားပါတယ်။
