ဖားကန့်မြို့နယ်၊ မိုးညှင်းခရိုင်၊ အင်းတော်ကြီးဒေသ၊ ညောင်ပင်ကျေးရွာတွင် ယနေ့မနက် ၆ နာရီခွဲက အကြမ်းဖက် စစ်ကောင်စီတပ်ကို KIA တပ်ရင်း (၂၆)နဲ့ KPDF ပူးပေါင်းတပ်မှ မိုင်းဆွဲတိုက်ခိုက်မှု ပြုလုပ်နိုင်ခဲ့ကြောင်း သိရပါတယ်။
အကြမ်းဖက် စစ်ကောင်စီတပ် ခမရ (၁၁၁) တပ်မှ အင်အား ၂၀ ဝန်းကျင်ပါ စစ်ကြောင်းက တပ်စွဲနေရာယူနေစဉ် KIA, KPDF ပူးပေါင်းတပ်မှ မိုင်းဖြင့် တိုက်ခိုက်ခဲ့တာကြောင့် စစ်ကောင်စီဘက်မှ ၂ ဦးသေဆုံးပြီး ၁ ဦးထိခိုက်ဒဏ်ရာရရှိခဲ့ကြောင်း စုံစမ်းသိရှိရပါတယ်။
အဆိုပါ စစ်ကောင်စီ စစ်ကြောင်းက ညောင်ပင်ကျေးရွာတွင် တပ်စွဲနေရာယူကာ စစ်ဆေးရေးဂိတ်ဖွင့်ကာ ဖြတ်သန်းသွားလာတဲ့ မော်တော်ယာဉ်၊ ဆိုကယ်များကို တားဆီးပြီး ငွေကြေးအဓမ္မကောက်ခံမှု ပြုလုပ်နေတာဖြစ်ပါတယ်။
စက်တင်ဘာ ၁၉ ရက်နေ့တုန်းကလည်း ကေအိုင်အေ တပ်ရင်း (၆) နယ်မြေ ဆိုင်းတောင်နဲ့ ဖားပြင်ကြား မော်တော်ယာဉ်ဖြင့် စစ်ရေးလှုပ်ရှားလာတဲ့ စစ်ကောင်စီတပ် ယာဉ်ကို ကေအိုင်အေတပ်မှ မိုင်းဆွဲတိုက်ခိုက်မှု ပြုလုပ်ခဲ့ပါသေးတယ်။
