ကေအိုင်အိုထိန်းချုပ်နယ်မြေ၊ မိုင်ဂျာယန်မြို့မှာရှိတဲ့ Federal Law Academy ကျောင်းကိုလာမယ့် အောက်တိုဘာလ ၁၅ရက်ကနေ ပြန်လည်ဖွင့်လှစ်သွားတော့မှာဖြစ်ပါတယ်။
Federal Law Academy ကိုတက်ရောက်မယ့်ကျောင်းသားတွေဟာ KIO အစိုးရကျောင်းမှ အထက်တန်းပညာကိုအောင်ထားပြီးသူများ၊ ကေအိုင်အိုအစိုးရဌာနအသီးသီးတွင် ၃နှစ်တာဝန်ထမ်းဆောင်တဲ့ အတွေ့အကြုံရှိသူများ၊ မြန်မာအစိုးရကျောင်းပြီးတဲ့ကျောင်းသားတွေက အနည်းဆုံးကောလိပ် သို့မဟုတ် တက္ကသိုလ်များတွင် ဒုတိယနှစ်အောင်မြင်ပြီးသူများကိုသာ လက်ခံသင်ကြားပေးသွားမှာဖြစ်ပါတယ်။
Federal Law Academy ကို ယခင်နှစ်တွေတုန်းက မေလကနေ စက်တင်ဘာလထိ တစ်ကြိမ်၊ နိုဝင်ဘာလကနေ မတ်လ အထိတစ်ကြိမ်သင်ကြားပေးခဲ့တဲ့ကျောင်းဖြစ်ပါတယ်။ ၂၀၂၀ ခုနှစ်မှာတော့ COVID-19 ကပ်ရောဂါကြောင့် ကျောင်းကိုခေတ္တပိတ်ထားရပြီး ဒီကျောင်းဟာ လူမျိုးမရွေးတတ်ရောက်နိုင်တဲ့ကျောင်းဖြစ်သလို အဝေးရောက်ကျောင်းသားများကိုတော့ အွန်လိုင်းကနေတဆင့် အချိန်ပြည့်သင်ကြားပေးမှာဖြစ်သလို KIO နယ်မြေအတွင်းနဲ့ မြန်မာအစိုးရနယ်မြေရှိ ကျောင်းသားများကိုတော့ ကျောင်းတွင်သင်ကြားခံယူရမယ်လို့ သိရှိရပါတယ်။
“ဒီ မိုင်ဂျာယန်မှာရှိတဲ့ အဆင့်မြင့်ကျောင်းတချို့တွေဟာ လွန်ခဲ့တဲ့ တစ်လ,နှစ်လပိုင်းကတည်းကဖွင့်ခဲ့ပါတယ်။ ဒါပေမယ့် ကျွန်မတို့ကျောင်းတွေကတော့ COVID-19 ကြောင့် မြို့ထဲကလာမယ့်ကျောင်းသားတွေ သာမက မြန်မာနိုင်ငံအတွင်းရှိ ကျောင်းသားများလည်းပါဝင်ပြီး အခြားသောလူမျိုးများလည်းပါဝင်တာကြောင့် သူတို့ကျောင်းကိုလာနိုင်မယ့် အခြေအနေကိုကြည့်ပြီးတော့ အခုမှဒီကျောင်းကိုပြန်လည်ဖွင့်လှစ်လိုက်ခြင်းဖြစ်ပါတယ်။” လို့ Federal Law Academy ကျောင်းအုပ် ဆရာမ ဆန်မိုင် ကပြောပါတယ်။
Federal Law Academy မှာ တက်ရောက်မယ့်ကျောင်းသားတွေကို ကိုဗစ်-၁၉ ကပ်ရောဂါကာကွယ်နှိမ်နှင်းရေး ဗဟိုကော်မတီကနေ သတ်မှတ်ထားတဲ့ စည်းမျဉ်းစည်းကမ်းအတိုင်း အိပ်ခန်းတစ်ခန်းတွင် ကျောင်းသားတယောက်သာထားရှိပြီး စာသင်ခန်းထဲတွင်လည်း စားပွဲတလုံးကို သုံးယောက်သာထိုင်မယ့်နည်း ကျင့်သုံးပြီး သင်ကြားသွားမှာ ဖြစ်ပါတယ်။
Federal Law Academy ကျောင်းကို လွန်ခဲ့တဲ့ ၂၀၁၄ ခုနှစ်ကစတင်ဖွင့်လှစ်သင်းကြားခဲ့ပြီး ယခုအချိန်မှာတော့ Federal Law Academy ကျောင်းဆင်းသူဦးရေအယောက် (၇၀) ကျော်ရှိကြောင်းသိရှိရပါတယ်။
