မတ်လ ၁၀ ရက်၊ ၂၀၂၃ ခုနှစ်။
ကချင်လွတ်လပ်ရေးတပ်မတော် တပ်မဟာ ၁ တပ်ရင်း ၄ နယ်မြေ မယော်ဇွပ်အနီး မတ်လ ၉ ရက်နေ့ ညနေပိုင်း ၄ နာရီခွဲခန့်တွင် အကြမ်းဖက် စစ်ကောင်စီတပ်ရဲ့ စစ်ယာဉ်တန်းကို ကေအိုင်အေတပ်မှ ကြားဖြတ်မိုင်းဆွဲတိုက်ခိုက်နိုင်ခဲ့ကြောင်း သိရပါတယ်။
မြစ်ကြီးနားမြို့ကနေ စစ်ယာဉ် ၄ စီးဖြင့် အင်အား ၇၀ ကျော်ပါ ယာဉ်တန်းက စစ်လက်နက်ခဲယမ်းများ၊ ရိက္ခာများဖြည့်တင်းကာ ကေအိုင်အေနယ်မြေဘက် စစ်ရေးလှုပ်ရှားလာခြင်းကြောင့် ကြားဖြတ်တိုက်ခိုက်လိုက်ခြင်းဖြစ်ကာ နှစ်ဖက် အပြန်အလှန်တိုက်ခိုက်မှုတွေလည်း ရှိခဲ့ကြောင်း သတင်းရရှိပါတယ်။
ယမန်နေ့ညနေပိုင်းတွင် ကေအိုင်အေတပ်မဟာ ၉ တပ်ရင်း ၂၆ နယ်မြေ ချောင်းဝနဲ့ နမ့်မော်ကြား ကုလားကုန်းကျေးရွာအနီး လယ်တော်တွင် ချောင်းဝပြည်သူ့စစ်စခန်းတွင် လာရောက်စခန်းချနေထိုင်နေတဲ့ အကြမ်းဖက် စစ်ကောင်စီတပ် ခလရ ၄၂ တပ်က အင်အား ၁၀၀ ဝန်းကျင်ပါ စစ်ကြောင်းက ကားနှစ်စီးဖြင့် အရှေ့ကန် အသွားလမ်းပိုင်း ထိုးစစ်ဆင်လာခြင်းကြောင့် ကေအိုင်အေပူးပေါင်းတပ်မှ တိုက်ခိုက်မှု ပြုလုပ်ခဲ့ကြောင်း သိရပါတယ်။
ကေအိုင်အေတပ်နဲ့ အကြမ်းဖက် စစ်ကောင်စီတပ်ကြား တိုက်ပွဲများ ဆက်တိုက်ဆိုသလို ဖြစ်ပွားနေပြီး ပြင်းထန်နေတာကြောင့် မတ်လ ၁၀ ရက်နေ့ မနက် ၁ နာရီခန့်တွင်လည်း တံတားဦးလေတပ်စခန်းမှ အကြမ်းဖက် စစ်ကောင်စီ ဂျက်တိုက်လေယာဉ် ၂ စီးဖြင့် ကေအိုင်အေတပ်မဟာ ၉ တပ်ရင်း ၆ နယ်မြေဘက် လာရောက်ဗုံးကြဲတိုက်ခိုက်ခဲ့တာကြောင့် နေအိမ်အချို့ ပျက်စီးသွားခဲ့ရပေမယ့် လူထိခိုက်မှုကတော့ မရှိခဲ့ကြောင်း သိရပါတယ်။
