မေလ ၆ ရက်၊ ၂၀၂၃ ခုနှစ်။
အမေရိကန်နိုင်ငံတွင် ယနေ့ မေလ ၆ ရက်နေ့မှာ ပြုလုပ်ခဲ့တဲ့ One Championship ရဲ့ One Fight Night 10 ပြိုင်ပွဲတွင် တရုတ်နိုင်ငံသား ဖန်ရောင်းနဲ့ ထိုးသတ်ခဲ့တဲ့ မြန်မာ့စပါးအုံးမြွေ အောင်လအန်ဆန်တစ်ယောက် ဒုတိယအချီတွင် ချုပ်ကွက်ဖြင့် အနိုင်ရရှိခဲ့ပါတယ်။
ပထမအချီတွင် နှစ်ဖက်စလုံး အားအင်အပြည့်ဖြင့် ဆော့ကစားအပြီး ဒုတိယအချီအရောက်တွင် ကချင်သားကြီး အောင်လအန်ဆန် ခန္ဓာကိုယ်ဟန်ချက်ပျက်သွားခြင်းကို ဖန်ရောင်းတစ်ယောက် အခွင့်ကောင်းယူဖို့ လှဲချဖို့ကြိုးစားနေစဉ် အောင်လအန်ဆန်ရဲ့ လည်ပင်းအမြန်ချုပ်ကွက်ကြောင့် တောင့်ခံနိုင်ခြင်းမရှိ အရှုံးပေးခဲ့ရပါတယ်။
မြန်မာ့အချစ်တော် အောင်လအန်ဆန်က ဖန််ရောင်းကို အနိုင်ရရှိခဲ့တာကြောင့် သူဆုံးရှုံးခဲ့ရတဲ့ ချန်ပီယံခါးပတ်အတွက် ပြန်လည်ရယူနိုင်ဖို့ အလွန်နီးစပ်သွားပြီဖြစ်ကာ သုံးပွဲမြောက်ဆက်တိုက်အနိုင်ရရှိထားတာကြောင့် နောက်တစ်ပွဲတွင် ပွဲကောင်းအဖြစ် ချန်ပီယံခါးပတ်လုပွဲအတွက် စိန်ခေါ်ထိုးသတ်ဖို့ အခွင့်အလမ်းရရှိသွားပြီဖြစ်ပါတယ်။
နိုင်ပွဲရအပြီး အောင်လအန်ဆန်က ဘုရားသခင်ကို ကျေးဇူးတင်သလို အစဉ်အမြဲအားပေးတဲ့ မြန်မာပရိသတ်များကိုလည်း ကျေးဇူးတင်ရှိပြီး မြန်မာပြည်အတွက် ဆုတောင်းပေးကြဖို့ ပြောဆိုခဲ့ပါတယ်။
မြန်မာပြည်အတွက် ကိုယ်စားပြုကစားရတာ အလွန်ဝမ်းမြောက်မိကြောင်း အောင်လအန်ဆန်က သူ့ရဲ့ လူမှုကွန်ယက်စာမျက်နှာကနေ ပြောကြားခဲ့ပါတယ်။
“မြန်မာပြည်အတွက် အားကစားသမားတစ်ယောက်နေဖြင့် ကမ္ဘာမှာ ကိုယ်စားပြုကာ ကစားရတာကို အရမ်းဝမ်းသာမိပါတယ်။ မြန်မာပရိသတ်တွေကို အရမ်းကျေးဇူးတင်ပါတယ်။ နောက်တစ်ပွဲမှာ ချန်ပီယံရှစ်ပွဲဖြစ်ဖို့ ယုံကြည်တယ်။ ဒီပွဲက စာချုပ်အရ နောက်ဆုံးပွဲဖြစ်ပါတယ်။ ချန်ပီယံဖြစ်အောင် ကြိုးစားသွားပါမယ်။”
အောင်လအန်ဆန်တစ်ယောက် ချန်ပီယံလမ်းကြောင်းပေါ်တစ်ကျော့ ပြန်လည်ရောက်ရှိလာဖို့ နီးစပ်သွားတာကြောင့် သူ့ကိုအားပေးနေတဲ့ ပရိသတ်များကလည်း ဝမ်းမြောက်ဝမ်းသာနေကြပါတယ်။
ပရိသတ်တစ်ဦးကတော့ “အောင်လ နိုင်ပွဲရရှိသွားတဲ့အတွက် အင်မတန်ဝမ်းသာတယ်ဗျာ၊ နောက်တစ်ပွဲမှာ ချန်ပီယံခါးပတ်ရရှိပါစေလို့ ဆုတောင်းပေးပါတယ်၊ ချန်ပီယံခါးပတ်ရပြီးရင်တော့ သိုင်းပေါင်းစုံအားကစားကနေ အနားယူဖို့မျှော်လင့်မိတယ်” လို့ သူကပြောပါတယ်။
