ဖေဖော်ဝါရီ ၂၁ ရက်၊ ၂၀၂၃ ခုနှစ်။
ရှမ်းပြည်နယ်မြောက်ပိုင်း မုံကိုးဒေသ ဘန်ခါးအနီး ဖေဖော်ဝါရီလ ၂၀ ရက်နေ့ ညနေပိုင်း ၁ နာရီခွဲခန့်တွင် ကချင်လွတ်လပ်ရေးတပ်မတော် တပ်မဟာ ၆ တပ်ရင်း ၃၆ နဲ့ အကြမ်းဖက် စစ်ကောင်စီတပ် တပ်မ ၉၉ ကြား တိုက်ပွဲဖြစ်ပွားခဲ့ပါတယ်။
ကေအိုင်အေတပ်စခန်းဘက် အကြမ်းဖက် စစ်ကောင်စီတပ်မှ အင်အားအလုံးအရင်းဖြင့် ထိုးစစ်ဆင်တိုက်ခိုက်မှုတွေ ပြုလုပ်လာခြင်းကြောင့် ကေအိုင်အေတပ်မှ စောင့်ကြိုတိုက်ခိုက်မှု လုပ်ဆောင်ခဲ့ကြောင်း သိရပါတယ်။
ဖေဖော်ဝါရီ ၁၉ ရက်နေ့မှာလည်း မုန်းခေါင်အထက်ပိုင်း လိုင်ကာဇွပ်ဂျာအနီး ကေအိုင်အေတပ်မဟာ ၃ တပ်ရင်း ၂၇ နဲ့ အကြမ်းဖက် စစ်ကောင်စီတပ်ကြား ထိတွေ့တိုက်ပွဲလည်း ရှိခဲ့ပါတယ်။
လိုင်ကာဇွပ်ဂျာဘက် စစ်ရေးလှုပ်ရှားမှု ပြုလုပ်လာတဲ့ အကြမ်းဖက် စစ်ကောင်စီတပ်ကို ကေအိုင်အေတပ်မှ မနက် ၈ နာရီတွင် တစ်ကြိမ် မိုင်းဖြင့် ကြားဖြတ်တိုက်ခိုက်ခဲ့ပြီး ထပ်မံစစ်ရေးလှုပ်ရှားလာခြင်းကြောင့် ညနေပိုင်း ၂ နာရီခွဲခန့်တွင် ထပ်မံထိတွေ့တိုက်ပွဲဖြစ်ပွားခဲ့ပါတယ်။
အဆိုပါတိုက်ပွဲတွင် အကြမ်းဖက် စစ်ကောင်စီတပ်မှ ထိခိုက်သေဆုံးမှုများပြားခဲ့သလို တိုက်ပွဲပြီးသွားချိန်များတွင်လည်း အနီးဝန်းကျင်ဘက် လက်နက်များ ရမ်းသမ်းပစ်ခတ်နေခဲ့ကြောင်း သိရပါတယ်။
ကေအိုင်အေတပ်ရင်း ၂၇ နယ်မြေတွင် ဖေဖော်ဝါရီ ၁၇ ရက်နေ့က စတင်ပြီး အကြမ်းဖက် စစ်ကောင်စီတပ်မှ ထိုးစစ်ဆင် စစ်ရေးလှုပ်ရှားမှု ပြုလုပ်လာခြင်းကြောင့် ဘန်ဂေါ်၊ နတ်ကြီးကုန်းကျေးရွာအနီးများတွင် တိုက်ပွဲ ပြင်းထန်စွာ ဖြစ်ပွားခဲ့ပါတယ်။
