မတ်လ ၁ ရက်၊ ၂၀၂၃ ခုနှစ်။
ကချင်လွတ်လပ်ရေးတပ်မတော် တပ်မဟာ ၆ နဲ့ တပ်မဟာ ၉ နယ်မြေများတွင် ကေအိုင်အေတပ်နဲ့ အကြမ်းဖက် စစ်ကောင်စီတပ်ကြား ထိတွေ့တိုက်ပွဲဖြစ်ပွားမှုတွေ ဖြစ်ပွားခဲ့ပါတယ်။
ရှမ်းပြည်နယ်မြောက်ပိုင်း၊ ကွတ်ခိုင်မြို့နယ်၊ နောင်ဆွေကျေးရွာတွင် ယမန်နေ့ ဖေဖော်ဝါရီ ၂၈ ရက်နေ့ မနက် ၉ နာရီခွဲခန့်တွင် ကွတ်ခိုင်မြို့ကနေ ခြေလျင်စစ်ကြောင်းဖြင့် ထွက်ခွာလာတဲ့ အင်အား ၁၅ ဦးပါ စစ်ကောင်စီတပ်ကို ကေအိုင်အေတပ်မဟာ ၆ တပ်ရင်း ၉ မှ ကြားဖြတ်တိုက်ခိုက်ခဲ့ကြောင်း သိရပါတယ်။
တိုက်ပွဲဖြစ်ပွားအပြီး အကမြ်းဖက် စစ်ကောင်စီတပ်က စစ်အင်အားထပ်မံတိုးချဲ့ကာ နောင်ဆွေကျေးရွာတွင် တပ်စွဲနေရာယူကာ အနီးဝန်းကျင်ဘက် လက်နက်ကြီးပစ်ခတ်မှုတွေ ပြုလုပ်နေပြီး ကွတ်ခိုင်ဗျူဟာကုန်းကနေလည်း လက်နက်ကြီးများ ရမ်းသမ်းပစ်ခတ်နေခဲ့ကြောင်း သိရပါတယ်။
ယမန်နေ့မှာပင် မနက် ၅ နာရီခွဲခန့်မှာတော့ ကေအိုင်အေတပ်မဟာ ၉ တပ်ရင်း ၆ နယ်မြေဖြစ်တဲ့ ဆိုင်းဂျာဘွမ်ကျေးရွာဘက် အိမ်စီးကားဖြင့် သွားလာနေတဲ့ အကြမ်းဖက် စစ်ကောင်စီတပ်ကို ကေအိုင်အေတပ်မှ မိုင်းဆွဲတိုက်ခိုက်ခဲ့ပါတယ်။
ရှရော်ခကျေးရွာနဲ့ ဆိုင်းဂျာဘွမ်ကျေးရွာကြား စဗျစ်ခူးကျေးရွာ မုဒ်ဝအနီးတွင်လည်း ဖေဖော်ဝါရီ ၂၇ ရက် ညနေပိုင်း ၅ နာရီခန့်တွင် စစ်ရေးလှုပ်ရှားနေတဲ့ အကြမ်းဖက် စစ်ကောင်စီတပ်ကို ကေအိုင်အေတပ်မှ ကြားဖြတ်မိုင်းဆွဲတိုက်ခိုက်ခဲ့ပြီး ထို့နောက် စစ်ကောင်စီတပ်က စဗျစ်ခူးကျေးရွာဘက် ဝင်ရောက်ကာ လူငယ်များကို ဖမ်းဆီးမှုတွေ ရှိခဲ့ကြောင်း သိရပါတယ်။
ဖားကန့်မြို့နယ် တံတားညီနောင်ကျေးရွာရှိ ဒေသခံ ၂ ဦးကို နန့်ယားကျေးရွာရှိ အကြမ်းဖက် စစ်ကောင်စီတပ် ခမရ ၁၂ မှ သံသရာဖြင့် ဖေဖော်ဝါရီ ၁၄ ရက်နေ့ကတည်းက ဖမ်းဆီးထားရာ ၂ ပတ်ကြာမြင့်လာပေမယ့် အိမ်ပြန်ရောက်လာခြင်းမရှိသေးတာကြောင့် မိသားစုဝင်များက စိုးရိမ်နေကြပါတယ်။
