ယမန်နေ့ ဇွန်လ ၂၂ ရက်နေ့ ၁၀ နာရီခွဲအချိန်တွင် ဖားကန့်မြို့ နမ့်မော်ဘက်ကနေ ခြေလျင်ဖြင့် စစ်ရေးလှုပ်ရှားလာတဲ့ တပ်အင်အား (၃၀) ပါဝင်တဲ့ စစ်ကောင်စီတပ် ခမရ (၁၁၆) အဖွဲ့ကို တာမခန်အဆင်းလမ်း ကသိုဏ်းတောင်တွင် ကချင်လွတ်လပ်ရေးတပ်မတော် တပ်မဟာ (၉) တပ်ရင်း (၂၆)မှ စောင့်ကြိုပြီး မိုင်းဆွဲတိုက်ခိုက်စဉ် အာဏာသိမ်းစစ်တပ်ဘက်မှ ၂ ဦးသေဆုံးပြီး ၈ ဦးထက်မနည်း ဒဏ်ရာရရှိခဲ့ကြောင်း သိရပါတယ်။
ဇွန်လ ၂၁ ရက်နေ့ ၂ နာရီခန့်မှာတော့ ဖားကန့်မြို့ ဆယ်ဇင်းကျေးရွာကနေ စစ်ယာဉ်တန်း ၃ စီးဖြင့် လှုပ်ရှားလာတဲ့ အာဏာသိမ်းစစ်တပ်ကို တပ်ရင်း (၂၆) အဖွဲ့မှ ကျောက်ပုန်းအရောက်တွင် ကြားဖြတ်တိုက်မှု လုပ်ဆောင်ခဲ့ကာ စစ်ကောင်စီတပ်သား ၇ ဦးသေဆုံးပြီး ၇ ဦးဒဏ်ရာပြင်းထန်ရရှိခဲ့ကာ လက်နက်အချို့ကိုလည်း သိမ်းဆည်းနိုင်ခဲ့ကြောင်း ဒေသ သတင်းတွေကဆိုပါတယ်။
ထို့ပြင် ဇွန်လ ၂၁ ရက်နေ့မှာပင် မိုးညှင်းမြို့ရှိ အာဏာသိမ်းစစ်တပ် ခမရ (၃၈၅) မှ စစ်ယာဉ်တန်း (၄) စီးဖြင့် လှုပ်ရှားသွားလာနေစဉ် ကေအိုင်အေ တပ်မဟာ (၈) လက်အောက်အဖွဲ့မှ ကြားဖြတ်မိုင်းဆွဲတိုက်ခိုက်ခဲ့အပြီး စစ်ယာဉ်တန်း ၂ စီး ပျက်စီးကာ စစ်ကောင်စီတပ်သား ၁၅ ဦး သေဆုံးသွားကြောင်း ရှေ့တန်းစခန်းထံမှ သိရပါတယ်။
ရှမ်းပြည်နယ် မြောက်ပိုင်း (Kachin Sub-State) ဟူနောင်နဲ့ နမ်ဂွတ်ကျေးရွာကြားတွင် အာဏာသိမ်းစစ်တပ် တပ်မ ၉၉ နဲ့ ကေအိုင်အေ တပ်မဟာ (၄) တပ်ရင်း (၈) နဲ့ တပ်ရင်း (၂၉) ပူးပေါင်းအဖွဲ့နဲ့ ဇွန်လ ၂၁ ရက်နေ့ ညနေပိုင်း ၃ နာရီခွဲကနေ ၄ နာရီအချိန်တွင်း ထိပ်တိုက်ရင်ဆိုင် တိုက်ပွဲဖြစ်ပွားမှု ရှိခဲ့ပါတယ်။
