ကေအိုင်အို ကိုဗစ်-၁၉ ကပ်ရောဂါ ကာကွယ်နှိမ်နှင်းရေး ဗဟိုကော်မတီမှ ကော်မတီဝင်များအနေဖြင့် အရှေ့ပိုင်းဒေသ ကော်မတီဝင်များဆီ သွားရောက်တွေ့ဆုံကာ အတွေ့အကြုံဖလှယ်ခြင်းကို ဇွန်လ ၃ ရက်နဲ့ ၄ ရက်အတွင်း လုပ်ဆောင်ခဲ့ကြပါတယ်။ ကေအိုင်အို ကိုဗစ်-၁၉ ကပ်ရောဂါ ကာကွယ်နှိမ်နှင်းရေး ဗဟိုကော်မတီ ဥက္ကဋ္ဌ ဆရာကြီး ဆွမ်လွတ်ဂမ်၊ အတွင်းရေးမှူး ဗိုလ်ကြီး လဖိုင်ဟိန်ဝမ်နှင့် ကော်မတီအဖွဲ့ဝင် ဆလမ်ဂဘာ လဖိုင်ခွန်နောင်တို့အနေဖြင့် အရှေ့ပိုင်းဒေသရှိ စစ်ဆေးရေးနေရာနဲ့ အသွားအလာကန့်သတ်စောင့်ကြည့်ရေးနေရာများကို သွားရောက် ကြည့်ရှုစစ်ဆေးကာ အတွေ့အကြုံဖလှယ်ရင်း လိုအပ်ချက်များကို ဖြည့်စွက်ပြီး ကပ်ရောဂါကာကွယ်တားဆီးရေးလုပ်ငန်းတွင် အသုံးပြုဖို့ အရေးပေါ်လူနာတင်ယဉ်တစ်စီး ပေးအပ်ခဲ့တယ်လို့ သိရပါတယ်။ အရှေ့ပိုင်းဒေသမှာ အေအာတီနဲ့တီဘီဆေးသုံးစွဲရသူတွေရှိကာ ထိုသူများက လွယ်ဂျယ်ဘက်သွားရောက်ထုတ်ယူရကာ အသွားအလာအခက်အခဲရှိကြောင်း ပြောဆိုခဲ့ကြပါတယ်။ “ပေးလိုက်တဲ့ဆေးကတော့ ၁၅ ရက်စာပါ၊ စည်းကမ်းချက်တွေအရ လွယ်ဂျယ်သွားရင် ၁၄ ရက်အသွားအလာကန့်သတ်ဝင်ရမယ့် အခက်အခဲတွေရှိနေပါတယ်” လို့ အရှေ့ပိုင်းဒေသစစ်ဆေးရေးဂိတ်တာဝန်ခံ ဗိုလ်ကြီးဖောင်ယူးနော်မိုင်အနေဖြင့် ကေအိုင်အို ကိုဗစ်-၁၉ ကပ်ရောဂါ ကာကွယ်နှိမ်နှင်းရေး ဗဟိုကော်မတီကို တင်ပြခဲ့ပါတယ်။ ဒီအကြောင်းရင်းနဲ့သက်ဆိုင်ပြီး “ဆေးသွားရောက်ထုတ်ယူရမည့်သူများကို အသွားအလာကန့်သတ်စောင့်ကြည့်ခြင်းမလုပ်ဖို့ အဖွဲ့ချုပ်အနေဖြင့် ဆုံးဖြတ်ထားပါတယ်” လို့ အဖွဲ့ချုပ်အတွင်းရေးမှူး ဗိုလ်ကြီးလဖိုင်ဟိန်ဝမ်က ဆိုပါတယ်။ အရှေ့ပိုင်းဒေသ ကိုဗစ်-၁၉ ကပ်ရောဂါကာကွယ်နှိမ်နှင်းရေးအတွက် ကော်မတီအဖွဲ့ဝင် ၁၅ ဦးဖြင့် ဖွဲ့စည်းထားကာ မိုင်ဂျာယန်တွင် စစ်ဆေးရေးဂိတ် ၄ ခုနဲ့ အသွားအလာကန့်သတ်စောင့်ကြည့်ရေးနေရာ တစ်ခုနဲ့ အင်ဘာပါတွင် စစ်ဆေးရေးဂိတ် ၇ ခုနဲ့ အသွားအလာကန့်သတ်စောင့်ကြည့်ရေးနေရာ တစ်နေရာ ဖွင့်လှစ်ကာ ကာကွယ်တားဆီးရေးလုပ်ငန်းများလုပ်ဆောင်နေပြီး သီးခြားဆောင်ပါဝင်တဲ့ဆေးရုံလည်း လုပ်ဆောင်နေတယ်လို့ သိရပါတယ်။
