လွမ်းမောဖွယ် အလှမှ ရင်မောဖွယ် ဘဝသို့ (အပိုင်း – ၂)

မြစ်ဆုံ၏အလှများ၊ လီဒိုလမ်းတစ်ဖက်တချက်ရှိ စိမ်းစိုထူထပ်သော တောတန်းများနှင့်အတူ ပျောက်ကွယ်သွားသည့် အရာများတွင် ဟူးကောင်းမြေမှတောရိုင်းတိရိစ္ဆာန်များလည်း ပါသည်။  ဟူးကောင်းကျားထိန်းသိမ်းရေးဟူသော ဆိုင်းဘုတ်တပ်ထားသောလည်း ယင်းဒေသရှိ ကျား၊ ဆင်အပါအ၀င် တိရိစ္ဆာန်အမျိုးမျိုးတို့မှာ စားကျက်မြေရှားပါးလာသဖြင့် နာဂတောင်တန်းကို ဖြတ်ကျော်ကာ အန္ဒိယနိုင်ငံသို့ ပြောင်းရွေ့သွားကြပြီဖြစ်သည်။  ယုဇနကုမ္မဏီမှ တရကြမ်းမြေသိမ်း၊ တောရှင်းမှုများကြောင့် တောရိုင်းတိရိစ္ဆာန်များမှီတင်းနေထိုင်ရာ စားကျက်များပြောင်ရှင်း သွားသည်မှာ သိသာလှ သည်သာမက မိမိနိုင်ငံမှ တိရိစ္ဆာန်များ အခြားနိုင်ငံသို့ပြောင်းရွေ့သွားသည် ဟူသည်မှာ နိုင်ငံသိက္ခာကျလှပါသည်။

ကမ္ဘာကျော် တော်ဝင်ကျောက်စိမ်း ( Imperial Jade ) ထွက်ရှိရာ ဖားကန့်ဖက်သို့လည်း ကြည့်ကြ ပါအုံးစို့။ နှစ်စဉ်ဒေါ်လာသန်းပေါင်းများစွာတန်သည့် ကျောက်များထွက်ရာ ဖားကန့်သို့တက် သော ဖားကန့် မြစ်ကြီးနားလမ်းမှာ ဒေါ်လာသန်းပေါင်းများစွာတန်သည့် ရတနာမြေသို့သွားရာလမ်း ဟု ပြောရန်ခက်ပါသည်။ မိုးတွင်းတွင်တော့ ဗွက်တောထဲတွင် ရုန်းကန်သွားရသလို၊ နွေရာသီ ရောက်လျင်တော့ မုန့်လင်မယားဗန်းပေါ်ကားဆိုင်ကယ်မောင်းရသည့် အလား တနာရီလျင် ငါးမိုင်ပြည့် အောင်မောင်းနိုင်သည့် နေရာမှာရှားလှပါသည်။  သဲကန္တရတွင်မနေဖူးသဖြင့် သဲမုန်တိုင်း အကြောင်းမသိသော်လည်း ဖားကန့်မှ ဖုန်မုန်တိုင်းကတော့ ပြောစမှတ်ပြုရလောက်အောင် ဆိုးဝါးပါသည်။

ဖားကန့်နှင့် တနိုင်းတက်မည်ဆိုလျင် တိမ်တိုက်ကြားမောင်းဝင်သွားသည့် လေယဉ်ပမာ မည်သည့်အရာမှ ကောင်းစွာမြင်ရမည်မဟုတ်ပဲ ဖုန်တိုက်ကြားထဲသို့ ဖြတ်သန်း မောင်းနှင်ရမည်ဖြစ်သည်။ ဖုန်တိုက်မှ ပြန်ထွက်လာသောအခါတွင်တော့ လူစစ်စစ်မှ မျောက်ရုပ်ပေါက် သွားမည်ဖြစ်သည်။  ရယ်စရာကိုယ်တွေ့တခုကို ပြောပြချင်ပါသေးသည်။ ဖားကန့်မှ နှစ်ပေါင်း များစွာဝေးကွာပြီးနောက် လွန်ခဲ့သည့်နှစ်နှစ်ခန့်က တခေါက်ပြန်ရောက်သွားပါသည်။ ရောက်ခြင်း ခြင်း သူငယ်ချင်းဖြစ်သူထံသွားပြီး ဖားကန့်မှာနေတုန်း ဆိုင်ကယ်တစီးလောက် ဌားပေးပါဟု သွားပြောရာ ကြောင်ကြည့်နေသဖြင့် ဒီလူငါ့ကို ဌားချင်ပုံမရဘူး ဟု တွေးမိကာ တည်းခိုခန်းသို့ ရေမိုးချိုးရန် ပြန်သွားခဲ့သည်။ ရေချိုးပြီး ထမင်းစားရန်ပြန်ထွက်လာစဉ် သူငယ်ချင်းနှင့် ပက်ပင်းတိုးရာ ၀မ်းသာအားရနှင့်ပြေးလာပြီး ဘယ်တုန်းကရောက်သလဲ ဘာကူညီပေး ရမလဲဟု ပြာပြာသလဲ မေးပြန်သည်။ ငါခုနကမင်းဆီလာပြီး ဆိုင်ကယ်တောင်းသေးတယ်လေ ဟု ပြန်ပြောရာ ခုနက လာတာမင်းလား တကိုယ်လုံးဖုန်တက်နေလို့ ဘယ်လိုမှ ရုပ်ဖမ်းလို့မရဘူး။ တောင်းပန်ပါတယ်။ လာပို့ပေးပါမယ်ကွာဟု ပြောရလောက်အောင် လူရုပ်ပြောင်း သွား ခဲ့ ဘူးပါသည်။

လွန်ခဲ့သည့်နှစ်ပေါင်း ၂၀ ကျော်ခန့်က KIA မှ မူးယစ်ဆေးဝါးကို တင်းကျပ်စွာနိုမ်နင်းပြီးနောက် တွင်ဖားကန့်ဒေသတွင်  မူးယစ်ဆေးဝါးရောင်းဝယ်မှု၊ သုံးစွဲမှုများမှာ ပပျောက်လုနီးပါးအခြေအနေ သို့ရောက်ရှိခဲ့သည်ကို မှတ်သားဖူးပါသည်။ ယနေ့တွင်မူ ဖားကန့်ရှိ နံပါတ်၎ အရောင်း ဆိုင်များမှာ ဘုရားပွဲမှ ဆိုင်ခန်းများနှယ် တန်းစီပြီး ကြက်ပျံမကျအုတ်အုတ်ကျက်ကျက် ရောင်းဝယ်ဖောက်ကား နေကြသည်ကို ရင်နင့်ဖွယ် တွေ့မြင်ကြရပါမည်။

ဘိန်းစိမ်းထုတ် (ယမ်ဖေါင်) အရောင်းဌာနမှာ ဘူတာလက်မှတ်ရောင်းသည့်ကောင်တာကဲ့သို့ အပေါက်ကလေးများကြားမှ လက်ကလေးများ လျှိကာလျှိကာ ၀င်လိုက်ထွက်လိုက် လွပ်လပ်စွာရောင်းဝယ်နေကြသည်ကို တအံတသြ မြင်တွေ့ရသဖြင့် ရင်းနှီးသည့် ဘိန်းဆိုင်ပိုင်ရှင်ကို အဖမ်းအဆီးမရှိဘူးလားဟုမေးရာ ရဲဆီမှတဆင့် လက်လီလက်ကား ရောင်းဝယ်ခွင့်ရထားသူများထံမှ ၀ယ်ယူရောင်းချကြောင်း၊ စိတ်ချရကြောင်း၊ အပြင်က ၀ယ်ယူလျင်အဖမ်းအဆီးခံရနိုင်ကြောင်း ရှင်းပြပြန်သဖြင့် ထပ်ဆင့်အံသြရပြန်သည်။

စိတ်ချလက်ချရောင်းဝယ်နိုင်ရန် ပေးကမ်းဂါဝရ ပြုရသည့်နေရာ( ) နေရာရှိကြောင်း၊ နယ်မြေခံရဲမှုးအားပေးရသည့်ကြေးကို ခေါင်းပေါင်းကြေး၊ လက်ထောက်အားပေးရသည်ကို ဒုခေါင်းပေါင်းကြေးဟုခေါ်ပြီး ဌာနဆိုင်ရာ၊ စစ်တပ်၊ ကျေးရွာအုပ်ချုပ်ရေးမှူးအပါအ၀င် စစ်ဘက်နယ်ဘက် ဆိုင်ရာတို့အပြီးတွင် ကွင်းဆက်ဖြတ်ကြေးဟု သတ်သတ် ပေးရသည် လည်းရှိပါသည်။ ကွင်းဆက်ဖြတ်ကြေးဆိုသည်မှာ  မိမိဆီမှ ၀ယ်ယူသွားသူအား ရဲမှ ဖမ်းဆီးမိပြီး ရုံးတင်ပါက လက်ဝယ်ထားရှိမှု၊သုံးစွဲမှုဖြစ်သာ အမူတင်ပြီး မူလရောင်းချပေးသူအား  အမှုမှချန် လှပ် ထားပေးခြင်းကို ဆိုလိုခြင်းဖြစ်သည်။ စနစ်တကျပျက်ဆီးနေသည့် ရဲဝန်ထမ်းများနှင့် အတူမူးယစ် ဆေးစွဲနေသည့် ဒေသခံများကို တွေ့မြင်နေရသည်မှာ ၀မ်းနည်းဖွယ်ကောင်းလှပါသည်။

လွန်ခဲ့သည့်နှစ် ၂၀ ကျော်ကာလများတွင် ကျောက်စိမ်းထုတ်လုပ်မှုကို လူအားဖြင့်သာအဓိက လုပ်ဆောင်သဖြင့် မြေဆီလွာပျက်ဆီးမှုမှာ မများလှပါ။  စိမ်းလန်းအေးချမ်းသော တောတောင်များ၊ အေးမြကြည်လင်သည့် စမ်းရေ၊ ချောင်းရေများနှင့် စိမ်းလန်းသာယာနေသည့် အပြင် ကျောက်စိမ်းနှင့် အတူ ကျောက်သွေးများပါ ထွက်ရှိခဲ့သည်။

နိုင်ငံတော်ဘတ်ဂျတ်လိုငွေ၊ စစ်ဗိုလ်ချုပ် စစ်အသိုင်းအ၀ိုင်းများ ကြီးပွားချမ်းသာရန်၊ စစ်လက်နက်ပစ္စည်းများဝယ်ယူဖြည့်တင်းရန် အတွက် နိုင်ငံတော်နှင့် အကျိုးတူပူးပေါင်းထားသည် ဆိုသည့် အရင်းရှင်ကုမ္မဏီများ များ အစိုးရကို ၄၀ ရာခိုင်နှုန်း၊ ကုမ္မဏီမှ ၆၀ ရာခိုင်နှုန်းခွဲဝေသည့် စနစ်ဖြင့်  မြေကြီးမှန်သမျှကို ဥပဒေနှင့် အညီ သိမ်းပိုက်ကြလေသဖြင့် ဒေသခံ ကျောမွဲ လက်လုပ်လက်စားများသည်  ကုမ္မဏီများ စိတ်ကြိုက်မွေနှောက် တူးဖော်ရှာဖွေထားသည့် စွန့်ပစ် မြေပုံများတွင် အသက်နှင့်ရင်းကာ ရှာဖွေစားရသည့် အဖြစ်သို့ရောက်ရှိသွားသည်။ ယင်းကဲ့သို့ စားနုတ်စားပေါက်ကောက်စားသည် ကိုပင် မဓသာ သည့် ကုမ္မဏီများလည်းရှိသေးသည်။ ယခင်က ကြားနေကျဖြစ်သော ကျောက်စိမ်းဖြင့်သူဌေးဖြစ်သွားသူများ၊ ဘ၀ပြောင်းသွားသူများအကြောင်း အားကျဖွယ်ပုံပြင်များလည်း ဆိတ်သုဉ်းတိတ်ဆိတ်သွားခဲ့ပြီဖြစ်သည်။

ထိုထက်ပိုဆိုးသည်မှာ တရုတ်လူမျိုးပိုင်မြန်မာကုမ္မဏီများသည် ရပ်ရွာအုပ်ချုပ်သူများနှင့် ပေါင်း၍ လူနေရပ်ကွက်များတွင် မြေဇာပုံပေးခြင်း၊ ကျောက်တွင်းတွင် မိုင်းခွဲသည့်အခါ မိုင်းပေါက်ကို လူနေရပ်ကွက်ဘက်သို့လှည့်ကာ ခဲမိုးရွာပေးခြင်းတို့ပြုလုပ်လေ့ရှိသောကြောင့် မိုင်းသံ ကြားလျင် လူကြီးမဆိုထားနှင့် ကလေးများပင် စားပွဲအောက်၊ ကုတင်အောက်သို့ ၀င်ပုန်းရန်မှာ သင်ရန်မလိုပဲ အလိုလိုတတ်နေကြပြီဖြစ်သည်။ ထိုသို့ နေမရထိုင်မရဖြစ်ရန်ပြုလုပ်ရုံမက ကုမ္မဏီများနှင့် ရပ်ရွာအုပ်ချုပ်သူများ ပူးပေါင်းကာ လူနေရပ်ကွက်များကို အတင်းအဓ္ဓမ လုပ်ကွက်ဖော်ခြင်းဖြစ်သည်။ အတင်းအဓ္ဓမလုပ်ခြင်းဖြစ်သောကြောင့် နေရာပြောင်းရွေ့ရသည့်အပေါ်ပေးသည့် လျော်ကြေးမှာလည်း မဖြစ်စလောက်သာဖြစ်သည်။

လုပ်ကွက်သို့ထုံးစံမှာ လူနေရပ်ကွက်နှင့်  ဝေးနိုင်သမျှဝေးရမည် ဖြစ်သော်လည်း မတော်လောဘကြောင့် လူနေရပ်ကွက်များကို ဖျက်ကာ ကျောက်လုပ်ကွက် အဖြစ်ပြောင်းပစ်သည်မှာ အကြိမ်ကြိမ်ဖြစ်သည်။ ပြောင်းခိုင်းသည့် နေရာမှာလည်း အာမခံချက်ရှိသော မြေနေရာ မဟုတ်။ တောင်တလုံးစာမျှမြင့်မားသည့် မြေဇာပုံပေါ်သို့ ပြောင်းခိုင်းခြင်းဖြစ်သည်။ မြင့်မားလှသော မြေဇာပုံထိပ်မှ ဘုရားသခင်ဟု ခပ်တိုးတိုးခေါ်လျင်ပင် ကြားနိုင်လောက်သည်ဖြစ်ရာ မိုးတွင်းမြေပြိုပါက သေဆုံးသည့်အရေအတွက်မှာလည်း မနည်းပါ။  ဖားကန့်တွင် မြေဇာသယ်ရန် အသုံးပြုသည့် ကားများမှာ ကားသီးသန့်အလေးချိန်ပင် တန် ၈၀ ရှိပြီး မြေဇာတင်ပြီးပါက တန် ၁၀၀ ကျော်ရှိသည့်ကားများကို အသုံးပြုနေကြသော်လည်း တန် ၃၀ ခံနိုင်အားရှိသည့် တံတားပင်လျှင် ကုမ္မဏီနှင့် အစိုးရမှ တည်ဆောက်ပြုပြင်ပေးခြင်းမရှိပဲ သုံးစွဲနေသည်မှာလည်း သဘာဝကျသည့် ကိစ္စမဟုတ်ပါ။

ဇူလိုင် ၁၉ ရက်နေ့တွင်တော့ ကျောင်းနေစဉ်က ဆိုခဲ့ရသည့် နိုင်ငံတော်သီချင်းကို ယောင်ယမ်းကာ ဆိုမိပါသည်။ ဒါတို့ပြည်၊ ဒါတို့မြေ၊ ဒို့ပိုင်တဲ့မြေ ဟု သီဆိုနေရာမှ အောက်ငုံ့ကြည့်မိရာ တောင်ထိပ် သဖွယ်မြင့်မားသည့် မြေဇာပုံတွင် ရပ်လျက်သားသီဆိုနေခြင်း ဖြစ်သည်ကို သတိ ရမိသည်။ အဖိုးတန် ကျောက်များထွက်သည့် ဒေသတွင် တရုတ်လုပ်ငန်းရှင်များမှ နေ့ရောညပါ တူးဖော်မှုကြောင့် ငါတို့ တိုင်းရင်းသားများအတွက် မြေတလက်မလောက်မှကျန်ပါ့အုံးမလား၊ ဖားကန့်မြို့တွင်းတွင်ပင် နေအိမ်များကို တလုံးချင်းဝယ်ယူပြီး တူးပစ်မည်ဟူသော သတင်းများကြားနေရသဖြင့်  နောင်လာမည့် လူများအတွက်  ဒါကကျောက်စိမ်းထွက်တဲ့ဖားကန့်မြို့ဟု ပြစရာ သမိုင်းအမွေအနှစ်များ ကျန်မှကျန်ပါ့အုံးမလားဟု အတွေးသံသရာလည်ရင်း ရင်မှာဆို့လာပါသည်။

 

ဆက်ပါအုံးမည်။

မလိဇွပ်

Leave a Reply

*